O músico e escritor Mero Iglesias será o encargado de pregoar a quinta edición do Festival de Cine de Música de Roca, que se celebrará na casa escola desta parroquia guitiricense os días 27 e 28 deste mes.
O pregón, fixado para as 21.30 horas do venres, servirá para inaugurar esta consolidada convocatoria organizada pola asociación cultural Xermolos, a cuxo quinto concurso de curtametraxes, que deben virar ao redor da temática musical, concorreron este ano ao redor de 150 creacións chegadas de países tan dispares como Estados Unidos, Venezuela ou India, entre os que se seleccionaron doce obras entre as dúas categorías do certame.
O público asistente á xornada do sábado será o encargado, cos seus votos, de elixir as obras gañadoras, que obterán unha recompensa en metálico de 100 euros e un trofeo artesanal deseñado polos vilalbés Marcos Ladra. As proxeccións comezarán ás 21.30 horas, e primeiro pasaranse as pezas galegas e despois as de fóra de Galicia.
O V Festival de Cine de Música de Roca clausurarase ao redor da medianoite do sábado, coa entrega de premios á obra gañadora en cada categoría
Na modalidade de Curtametraxes Galegas, a organización seleccionou catro obras finalistas, entre elas 'Da Cantora Madan Agi', un videoclip da profesora de música Sandra Tenreiro e un grupo de alumnos do IES Poeta Díaz Castro de Guitiriz inspirado no Pergamiño Vindel.
A selección de finalistas complétase coas creacións 'Il rumore', de Fran Álvarez; 'En pointe', de Noelia Muíño; e 'Xunta en Corcubión', de Xurxo Fernandes e Nuria Foz.
En canto a categoría de obras de fóra de Galicia, a organización elixiu oito curtametraxes, cinco deles españois: 'Kilmister' é a particular homenaxe de Ricardo Pastor a Motörhead; 'Enamorao de ti', do malagueño Tomás Romeu, presenta ao Cantinero de Cuba; Bernabé Bulnes aborda a nova vida dun separado en 'Solo de trompeta'; José Herrera presenta a un 'Cazatalentos' que intenta recuperar o prestixio de outrora e desde Barcelona Geofrey Cowper fala do bullying en 'Caminem lluny (camiñemos xuntos)'.
Os tres restantes son a peza experimental 'Millie & Jerry', de Nuzio Fazio (EE UU); a obra de animación venezonana 'Bakiro', de Miguel New; e a unión a través do baile de 'Spechless', de Ankit Anand (India).
O V Festival de Cine de Música de Roca clausurarase ao redor da medianoite do sábado, coa entrega de premios á obra gañadora en cada categoría, unha vez contabilizado o voto popular.
