O Concello de Meira realiza este ano por primeira vez un trampeo preventivo para controlar a poboación de avispa velutina no municipio, que consiste na colocación de 600 trampas durante os tres meses de primavera, segundo explica o tenente de alcalde, Agustín Méndez.
A iniciativa, a cargo da empresa Serpa de Viveiro, busca que non proliferen máis os niños desta especie invasora, tras retirar o ano pasado máis dunha trintena. "O plan é conter a entrada da velutina e atacar ás raíñas xa instaladas", explica o xerente de Serpa, José María Vázquez.
"Detectáronse mediante un estudo os puntos de acceso das primeiras raíñas que se instalaron en Meira e potenciáronse esas zonas para frear a súa entrada", din desde Serpa, incidindo en que ademais se traballa en zonas onde se retiraron niños.