A xuíza internacional de piragüismo Marta Felpeto Lamas será a encargada este ano de realizar o pregón das festas de San Ramón e Santa María de Vilalba, un acto enmarcado dentro da entrega de premis do oCertame Literario e que dá o pistoletazo de saída cada 30 de agosto ás patronais da capital chairega.
Felpeto, vilalbesa de nacemento pero asentada en Catoira desde o ano 2000, é todo un referente no mundo do piragüismo, a pesar de que nin vive diso nin se dedicou nunca a competir nesta disciplina. Tras formarse como xuíza –alcanzou o grao internacional en 2005–, pasou a formar parte da organigrama técnico da federación española e en marzo de 2015 converteuse na primeira muller española na historia na directiva da European Canoe Association, a federación europea deste deporte.
Todo iso levoulle a ser distingida o ano pasado coa Insignia Olímpica que outorga o Comité Olímpico Español e a converterse tamén na primeira española en entrar no órgano reitor da Federación Internacional de Piragüismo.
Marta Felpeto recibiu a petición do Concello –que lle rendeu un pequeno recoñecemento ao entregarlle unha mención especial na última Gala do Deporte Municipal– para ser a pregoeira con ilusión. "Pareceulle unha idea estupenda e estaba moi agradecida por que nos acordaramos dela", explicou a edila de cultura, Cheri Grandío, que engadiu sentirse "moi contenta de atopar a unha muller para ler o pregón, que era o que perseguía para cambiar o chip dos últimos anos".
A moza vilalbesa únese así á curta lista de pregoeiras do San Ramón, entre as que se atopan Ana Chao ou a presidenta do Grupo El Progreso, Blanca García Montenegro.
A súa intervención será no auditorio municipal xunto á entrega de premios do XLIV Certame Literario Concello de Vilalba, cuxo prazo de presentación de obras péchase este venres 13.
