O papel que está a realizar o Rácing Vilalbés no final de tempada cunha gran participación na fase de ascenso a Segunda División B, na que disputa por primeira vez na súa historia unha segunda eliminatoria, está a xerar unha bonita onda de apoio ao equipo por parte dos afeccionados e o pobo en xeral, que se envorcaron para arroupar aos xogadores nos dous partidos de play off que disputaron ata agora na casa. Uns ánimos que se trasladan tamén aos afastados desprazamentos que afrontan nos seus partidos de volta.
Se na viaxe a terras almerienses para medirse ao Atlético Pulpileño, rival da primeira rolda que eliminou nos penaltis, ao redor de medio centenar de valentes atrevéronse cos máis de mil quilómetros que había que percorrer, nesta ocasión o club verdivermello terá que dispor de dous autobuses para desprazar ás persoas que decidiron anotarse na viaxe organizada para acompañar ao equipo no partido de volta contra o Atlético Levante, co que empatou (1-1) na Magdalena.
Unha vez que se pechou este martes o prazo para inscribirse, a expedición verdivermella organizada polo club -habería que sumar xente que probablente viaxe pola súa conta, tal e como ocorreu para ir a Pulpí- suma preto de cen persoas, entre afeccionados e grupo deportivo -que rolda as 25 persoas entre xogadores e corpo técnico-, que viaxarán ata Valencia partindo da capital chairega o venres ás 23.00 horas para afrontar unha longa viaxe para vivir un partido que pode ser histórico.
E é que o Vilalbés cruza de novo a península e faino con todo por decidirse no encontro que se disputará o domingo ás 11.30 horas na Cidade Deportiva do Levante.
"A valoración da resposta da afección é moi positiva. Sinceramente, nunca pensei que se fora apuntar tanta xente. Oxalá isto non sexa unha febre temporal pola fase de ascenso e o apoio continúe despois", manifestou Francisco Ruiz, presidente do Rácing Vilalbés.
RECOÑECEMENTO. A gran tempada do Vilalbés reflíctese tamén nos recoñecementos que van saíndo ao finalizar a competición ligueira. Así, o cadro chairego recibirá da federación galega o premio ao equipo máis deportivo desta campaña, seguido do Alondras e o Bergantiños, segundo e terceiro na lista.
