O actual presidente de Africor Lugo e responsable da SAT A Vereda de Castro de Rei, Manuel Sandamil, acaba de ser elixido para encabezar a xunta directiva da Federación Frisoa Galega (Fefriga). Releva desta forma ao que tamén foi o seu predecesor no cargo na agrupación lucense, José Carlos Veiga Rodríguez, e será o representante galego na Confederación de Asociacións de Frisoa Española (Conafe) e na asemblea de Xenética Fontao.
Sandamil afronta esta nova andaina -na que está co seu compañeiro na directiva de Africor Lugo, Gonzalo Tirotea, que exerce de interventor en Fefriga- "con ilusión e con ganas de traballar e seguir un pouco na liña prevista a curto prazo", en referencia ao obxectivo de lograr a fusión dos catro Africor que hai en Galicia para así "levar todo conxuntamente, ser máis competitivos e seguir na primeira liña da raza frisoa en España".
Aínda así, e a pesar de que desde as catro entidades están de acordo en axuntar forzas, o proceso non se prevé sinxelo. "Vai levar tempo matizar todo e unificar criterios, porque cada un ten os seus socios, estatutos, contas e maneira de traballar. E tamén os seus propios apartados de servizos aos socios. Chegar a un punto de encontro non vai ser fácil, pero vai haber que traballar nesa liña tamén para abaratar custos", incide o novo presidente de Fefriga.
Sandamil tamén avanzou na intención de organizar, se a situación sanitaria permíteo, algún tipo de concurso -Fefriga organiza os concursos rexional e internacional da raza que se fan en Galicia- ou actividades como escolas de xuíces ou algunha en colaboración co Club de Xóvenes Gandeiros de Galicia. Ademais, a federación elabora anualmente as memorias dos animais máis destacados da comunidade.
A nova directiva de Fefriga complétase con Fernando Suárez, presidente de Africor Coruña, de vicepresidente; José Manuel Manteiga, presidente de Africor Pontevedra, de secretario; Manuel Villaverde, como tesoureiro; Gonzalo Tirotea, de interventor, e Andrés Formoso e os representantes de Africor Ourense como vocais.
