Máis de cincuenta explotacións de leite da provincia de Lugo están a enviar ás súas novillas a recriar ao primeiro centro público que funciona en Galicia, o que puxo en marcha a Deputación Provincial na granxa Gaioso Castro, logo dun investimento total que se achegou aos vinte millóns de euros. Confirmouno este luns o presidente da Deputación, Darío Campos, durante a visita que realizou, acompañado pola vicerreitora do campus de Lugo, Montserrat Valcárcel, ás obras do primeiro centro de investigación láctea da provincia, que están a ser desenvolvidas no municipio de Castro de Rei, en terreos da propia institución provincial, cun investimento de 2 millóns de euros.
"Hoxe temos unhas 600 novillas de máis de cincuenta explotacións da provincia", dixo Campos, nun centro de recría que "ten capacidade para case 3.000 e que lle dá prioridade de acceso" aos animais que proceden de granxas lucenses, "pois son unhas instalacións feitas para elas". Recordou que é "o centro de recría de vacún de leite máis grande de Galicia e onde cada semana están a entrar máis novillas" procedentes de explotacións "lucenses".
Lugo produce máis de 1,2 millóns de toneladas de leite ao ano e lidera a produción en Galicia e España
En canto ao centro de investigación láctea, a Deputación achega 1,3 millóns de euros para a súa construción, mentres que a Universidade de Santiago de Compostela (USC) investirá 750.000 euros. Estas instalacións servirán para que os alumnos da USC —Veterinaria, Enxeñería Agroalimentaria, Máster en Produción de Leite— poidan completar a súa formación e, ao mesmo tempo, desenvolver os seus proxectos de investigación.
Campos destacou que ambas as infraestruturas se enmarcan "dentro da aposta por unha Deputación rural", dado que en Lugo hai 3.600 explotacións lácteas "e o sector do leite representa o 18% do emprego da provincia". Lugo produce máis de 1,2 millóns de toneladas de leite ao ano e lidera a produción en Galicia e España.
