A empresa auxiliar Maessa anunciou un Ere extintivo que suporá o despedimento de 48 traballadores coincidindo co peche da central de Endesa nas Pontes, na que operaban ditos empregados.
O sindicato Comisións Obreiras censurou este xoves a medida da compañía durante unha comparecencia ante o complexo enerxético. O seu secretario xeral de Industria en Galicia, Víctor Ledo, enmarcouna nunha "transición non xusta" na zona.
En declaracións aos xornalistas, criticou que non se articularon "antes do peche da térmica alternativas diferentes" en aras de "garantir "a situación dos traballadores" dos cadros de persoal principal e auxiliar.
"Endesa ten que ser máis contundente á hora de tomar decisións que afectan os traballadores", estimou. Ademais, afeou que se comezase co traslado de membros do persoal principal a outros puntos de España "sen garantías de retorno".
Ledo indicou que empresas e administracións non concretaron "ningunha medida para as auxiliares" e advertiu que hai "outros despedimentos" en marcha noutras firmas. Así, alertou dun proceso de saída de operarios "a contapingas" nas próximas semanas. Por iso, recriminou que as "administracións están a pór sobre a mesa" iniciativas que son "papel mollado".
"Non se está cumprindo o convenio de transición das Pontes", salientou o representante sindical. Do mesmo xeito, sostivo que a Xunta de Galicia "está a estorbar" de face á implantación de proxectos "alternativos" na contorna. O procedemento de negociación sobre o expediente de regulación de emprego en Maessa comezou este mesmo xoves
