Un mastín de oito meses de idade foi devorado polos lobos na parroquia abadinesa de Fanoi, nunha leira que está pechada con arame e situada a apenas 500 metros das vivendas, no núcleo coñecido como Os Muíños.
Os feitos ocorreron na noite do mércores ao xoves. O can atacado estaba xunto a outro mastín, tamén cachorro, nunha leira con cabalos.
"Hoxe —por este xoves— pola mañá apareceunos un deles na casa, todo asustado. Non o dabamos sacado de aquí. E fomos ver que pasara e xa atopamos o outro, ao que só lle quedaba a cabeza. Comeuno todo", indicou o dono dos animais que sufriron o ataque, que deduce que este feito o protagonizaron polo menos dous ou tres lobos, polo estado no que quedou o can.
"Desde hai unhas semanas ven paseando dous ou tres lobos polas pistas da concentración parcelaria e por preto das casas, e ninguén fai nada", denuncia este veciño de Fanoi, que xa sufriu ataques deste estilo en anteriores ocasións.
"A nós o lobo xa nos matou poldros varios anos. Este ano xa van un par deles. E ultimamente nesta zona xa matou tres ou catro cans e deixou feridos uns poldros. A min non me gusta que se extinga o lobo, pero isto é algo fóra do normal", critica o gandeiro afectado.
O propietario dos animais atacados engade que están "fartos dos ataques do lobo" e que precisamente adquiriu estes dous mastines para tratar de porlles freo e defender ao seu gando. "Pero aos pobres pouco lles tocou defender", laméntase.