Un rabaño de ovellas sufriu este pasado martes en Castro de Rei o ataque dun lobo, que se saldou coa morte de tres dos nove animais que se atopaban pastando na leira a plena luz do día. Os feitos producíronse no barrio de Casas Novas, na parroquia de Dumpín, nunha leira que apenas dista a uns metros da vivenda dun veciño dos donos do rabaño.
Segundo relatou a propietaria dos animais —seis ovellas e tres cordeiros—, deixounos no prado á primeira hora da mañá, ás 7.15, e tres horas despois regresou e xa se atopou con que se producira o ataque.
Así, explicou que había restos de sangue no chan e que había dúas ovellas mortas e con parte do corpo que fora devorado. Ademais, decatouse de que había outra ovella que desaparecera, aínda que finalmente foi localizada non moi lonxe do lugar onde estaba inicialmente.
Os propietarios dos animais, que aseguraron que era a primeira vez que se producía un ataque deste tipo na zona, denunciaron o ocorrido ante a Garda Civil.
