Dous mozos —I.R.T., de 28 anos, e I.C.R., de 23— resultaron feridos de diversa consideración na madrugada do sábado ao domingo ao ser arroiados por un vehículo cando abandonaban o campo da festa de Oleiros, en Vilalba, onde se estaban celebrando os festexos en honra a San Mamede e o Ecce Homo.
O sinistro produciuse ao redor das 5.30 horas da madrugada, unha vez que finalizara a verbena, que reuniu a numeroso público, e na que se subiron ao escenario Pasito Show e Kubo, orquestra que presume de ter a montaxe máis grande de Europa. O eventó mobilizou a numerosos mozos da zona ata esta parroquia vilalbesa.
Segundo constataron algúns veciños, os dous feridos camiñaban pola marxe da estrada —sen chaleco reflector— en dirección aos seus vehículos, e a uns 300 ou 400 metros do campo da festa, foron atropelados por un coche no que viaxaba unha parella.
Foi no punto quilométrico 3,500 da estrada LU-P-6510 —un viario provincial que está sen pintar e que une Panchita con Oleiros e chega ata a parroquia cospeitesa de Piñeiro—. Trátase de unha zona na que apenas hai visibilidade, tal e como manifestaron algúns veciños, que confirmaron que non hai casas próximas, polo que tampouco hai iluminación pública.
Outros mozos que se atopaban no lugar no que se rexistrou o sinistro foron os encargados de dar a voz de alarma. Ata a zona desprazáronse dúas ambulancias do 061, ademais dunha patrulla do Subsector de Tráfico da Garda Civil.
Os ocupantes do vehículo mantivéronse na zona do accidente —inicialmente pensábase que poderían haberse dado á fuga, un extremo que foi descartado—, aínda que nun principio non recoñeceron os feitos.
As comprobacións dos axentes, que revisaron quen era o titular do coche, foi clave. Nese momento a muller confirmou que era ela a que conducía o vehículo cando se produciu o atropelo, polo que foi sometida ás probas de alcoholemia, que deron un resultado positivo.
Mentres tanto, os feridos que recibiron inicialmente asistencia do persoal sanitario no lugar do accidente, foron trasladados despois ao Hospital Universitario Lucus Augusti (Hula), onde se lles someteu a diversas probas para ver o alcance das lesións.
Un deles, I.C.R., de 23 anos, aínda continúa ingresado recuperándose das feridas, mentres que o outro, I.R.T., de 28, xa recibiu o alta e está no seu domicilio.
Pese ao alcance do sinistro, as festas de San Mamede e o Ecce Homo de Oleiros continuaron con normalidade na xornada do domingo, coa celebración da súa tradicional misa e procesión, que contou coa animación musical tanto na sesión vermú como na verbena nocturna amenizada pola orquestra Solara.
De feito, foi no transcurso destes actos cando moitos dos veciños da parroquia vilalbesa recibiron as primeiras informacións sobre o atropelo.
