A Garda Civil mantén aberta unha investigación para esclarecer se algúns dos asaltos perpetrados a negocios da provincia durante as últimas semanas poderían estar relacionados co mesmo grupo de delicuentes, xa que en varios deses roubos utilizáronse vehículos que foron subtraídos previamente.
Ese mesmo modus operandi parece ser o que se empregou no asalto que sufriu o pasado fin de semana o restaurante Los Mesones, no Mesón da Cabra de Guitiriz, no que segundo as testemuñas, os presuntos autores fuxiron en dous vehículos que os investigadores sospeitan que eran roubados.
Un veciño que se decatou do que estaba a ocorrer alertou á Garda Civil e incluso puido darlles aos axentes detalles sobre os coches —un deles un Seat León cun faro roto— usados no asalto, no que os ladróns romperon unha fiestra para acceder ao local, onde forzaron a máquina comecartos e levaron o diñeiro da rexistradora e tamén diversa lotería.
Hai unha semana, producíase un suceso similar en Rábade, onde os ladróns esnaquizaron a porta dun restaurante e levaron só o contido da rexistradora, xa que non lograron abrir nin a máquina comecartos nin a de tabaco. Segundo apuntaron no bar, os responsables usarían un vehículo roubado na zona, que posteriormente foi abandonado en Nadela.
As coincidencias nestes e outros delitos levaron aos investigadores a estudar se existen conexións entre os autores dos asaltos, que poderían recorrer ao roubo de vehículos para eludir os controis e dificultar o ser identificados por posibles testemuñas.
PATATOTAS. Non só os pequenos negocios e bares da provincia recibiron a visita dos amigos dos alleo. O pasado fin de semana, a fábrica de Patatotas de Castro foi obxecto dun roubo co método da aluaxe. Así, os ladróns, aproveitando a falta de actividade do polígono, empregarían un vehículo para forzar unha das portas da fábrica.
Non foi ata o luns cando os donos da planta souberon do suceso ao retomar a actividade. Os danos causados polos asaltantes, que se fixeron cun botín duns 1.000 euros, supera os 2.000.
San Benito e San Vitorio
A capela de San Benito de Pígara si sufriu un asalto hai semanas. Os autores apenas levaron nada, pois non se gardan obxectos de valor, do mesmo xeito que na de San Vitorio, preto de Labrada, á que entraron por unha fiestra.
