A Garda Civil investiga por homicidio por imprudencia grave a P.M.B.B, o condutor dunha furgoneta Fiat Ducato que o pasado 7 de xuño atropelaba un ciclista cando ambos circulaban á altura do quilómetro 8,3 da estrada LU-122 (Paraxes-Lourenzá) ao seu paso
O fatídico accidente, unha colisión por alcance cando ambos ían en sentido cara a Bretoña, produciuse minutos antes das seis de tarde, nun tramo recto e con boa visibilidade, segundo apuntaron os presentes. Dada a gravidade da vítima, mobilizouse non só a unha ambulancia asistencial con base en Meira e ao equipo médico da PAC desta localidade, senón tamén ao helicóptero medicalizado con base en Ourense, aínda que os sanitarios xa non puideron facer nada por salvar a vida do ciclista, Daniel Salgado Novo, de 47 anos de idade e veciño de Meira.
Ata o lugar dos feitos tamén se desprazaron o GES da Pontenova e a Garda Civil de Tráfico, que abriu unha investigación para tratar de esclarecer o ocorrido. A partir da información solicitada, os axentes consideran que o condutor implicado, que resultou ileso, puido incorrer nun delito de homicidio por imprudencia grave, tipificado no Código Penal con penas de prisión dun a catro anos, así como a privación do dereito a conducir vehículos a motor e ciclomotores dun a seis anos.
