O Ministerio para a Transición Ecolóxica, a través da Confederación Hidrográfica Miño-Sil, iniciou esta semana os traballos de limpeza no interior da Lagoa de Fonmiñá, unha actuación moi demandada polo Concello da Pastoriza para pór en valor un lugar emblemático e un dos puntos máis visitados do municipio chairego.
"É unha actuación moi importante e moi positiva. O Concello e a Deputación podemos realizar labores de limpeza nos arredores da lagoa pero non temos competencia para limpar o ollo da fonte, que é o que se fará agora", explica o rexedor da Pastoriza, Primitivo Iglesias, que agradece á confederación que tivese en conta a súa petición respecto diso.
"A Lagoa de Fonmiñá é o principal punto de atracción turístico da Pastoriza e necesitaba unha actuación urxente porque había moito tempo que non se realizaban nela traballos de limpeza. E esta actuación é moi importante para pola en valor pero tamén para preservar a flora e a fauna que hai na contorna", destaca o rexedor, que indica que estes traballos tamén son positivos para evitar problemas na subministración de auga.
Nas proximidades, o Concello ten unha estación de bombeo que abastece a varias parroquias. Os traballos de limpeza que iniciaron o mércores operarios da empresa Imacal, contan cun investimento inicial que supera os 6.000 euros e inclúense no contrato de servizo da conservación do dominio público hidráulico dos ríos da demarcación Miño-Sil na provincia de Lugo, onde o organismo da conca investirá máis de 757.000 euros. Prevese que a actuación se prolongue durante dúas semanas.
TRABALLAR SOBRE A AUGA. Para levar a cabo as tarefas de limpeza no interior da Lagoa de Fonmiñá está a utilizarse unha embarcación e barreiras flotantes para arrastre. Neste momento, un dos principais obxectivos dos operarios céntrase na retirada manual de algas Lemma, que están estancadas na zona da canle —nalgúns casos en estado de descomposición—, para evitar a afección que puidesen producir á calidade da auga.
A actuación, ademais, inclúe a retirada da espadana existente nos bordos da lagoa, nun ancho aproximado de entre 1,5 a dous metros, para mellorar a canle de desaugadoiro. Esta planta, a que na actualidade invadía gran parte da zona, impedía ver nalgúns casos a auga.
Por outra banda, como complemento a estas actuacións, procederase á roza selectiva de matogueira perimetral, a poda e clareo selectivo de ramas baixas e a curta sanitaria de pés secos para recuperar o fluxo de saída de auga da canle e evitar tapóns e desbordamentos.
Para iniciar os traballos, debido a que se realizan nun enclave con gran valor ambiental, foi necesario o permiso do Servizo Provincial de Conservación da Natureza.
