O III Foro Aeroespacional España-Chile, que se celebrou este ano en Santiago de Compostela logo de dúas edicións en Barcelona, pechouse este mércores no aeródromo chairego de Rozas cunha visita na que o Targus de Indra, esa aeronave pilotada que pretenden converter no dron máis grande fabricado en España, foi o protagonista.
"Mostramos aos asistentes ao foro hispano-chileno cal é o avance do noso proxecto co Targus. Estamos na fase de instalación no avión de todos os dispositivos que teñen que substituír o piloto", resumía José Manuel Pérez Pujazón, un dos responsables de Indra, que asegurou que nesta demostración non se optou por voar a nave.
O Targus pesa "1.230 quilos", matizou Pérez Pujazón, que asegurou que é a nave non tripulada en fabricación máis grande de España e unha das maiores a nivel mundial para propósitos civís.
Ademais do seu proxecto co Targus, os responsables de Indra aproveitaron o evento, no que participaron ao redor dunha vintena de persoas de diversos ámbitos, para presentar a través de vídeos o seu outro gran proxecto, o barco non tripulado que están a construír en Vigo.
"O foro contou cunha serie de conferencias moi interesantes sobre regulación do sector ou certificabilidade das aeronaves", resaltou o responsable de Indra, que indicou que, ademais dos seus proxectos, os asistentes ao foro tamén puideron coñecer as instalacións do Inta no aeródromo chairego e todo o seu equipamento.
