CASTRO DE REI. A multinacional Indra, socia comercial da Xunta, xunto a Babcock, na Civil UAVs Initiative, inicia no Centro de Investigación Aeroportada de Rozas (Ciar) do Inta as probas de simulación de voo da súa aposta máis ambiciosa, o avión opcionalmente tripulado Targus.
Indra e Gaerum, o seu socio principal no desenvolvemento desta aeronave, realizarán nas instalacións de Castro de Rei as simulacións de voo para validar «o deseño dos sistemas críticos» do Targus. Así, comprobarase o comportamento do sistema de control de voo, o de navegación e o de misión, «todos eles compoñentes que xogan un papel fundamental para a seguridade e a operatividade da aeronave».
A compañía precisa que usarán para iso unha metodoloxía coñecida como Software-In-the-Loop/Hardware-In-the-Loop, que permiten operar coma se a aeronave realmente estivese no aire. Desta forma analizará «o comportamento dos sistemas electrónicos nunha contorna dotada de total realismo, xa que os datos cos que se alimentan estes compoñentes foron recollidos en voos reais e replican perfectamente as situacións ás que se enfrontarán cando operen de forma real». De feito, segundo avanzan desde Indra, as horas de simulación poderán contabilizarse despois como horas de voo real, «unha vez que se acredite cun ensaio en voo a correlación entre o comportamento do sistema no simulador e no aire».
Estes estudos reducen custos e riscos cando haxa que probar no aire este avión de 1.250 quilos de ocupación opcional
Con este test dáse continuidade ás probas xa realizadas no laboratorio e valídanse decisións de deseño antes de pasar á fase de ensaios reais de voo, reducindo custos e minimizando riscos, segundo precisan desde Indra. Paralelamente, trabállase na integración dos equipos de terra, desde onde se opera a aeronave e recóllense os datos e imaxes que esta capta.
Todas estas probas son necesarias par obter a certificación de voo por parte das autoridades, «un proceso complexo, esixente e totalmente inédito» tendo en conta as particularidades do Targus, de 1.250 quilogramos e once metros de envergadura.
A idea é que este avión, cuxo deseño parte do MRI -usado na patrulla marítima, equipado con radar e cámara-, poida operar con piloto e sen el, o que facilitaría os desprazamentos ás zonas onde poida usarse sen tripulación. Equiparase «coa tecnoloxía máis avanzada» para labores de vixilancia marítima ou forestal, salvamento e rescate, loita contra o lume ou control de usos do chan ou do patrimonio.
