O Instituto de Estudos Chairegos (Iescha) ofrecerá unha ampla programación cultural de outono durante as próximas semanas, dentro das que se incluirán proxeccións de cine, actuacións musicais ou representacións teatrais.
A primeira das propostas será este venres, ás 21.00 horas, no auditorio municipal da capital chairega. Ao seu escenario subirase a banda lucense Berta Franklin, que presentará varios temas do seu segundo LP.
Xa en novembro, concretamente o día 8, Teatro O Bordelo representará en Vilalba a peza Toluras de proveito. O espectáculo será ás 21.00 horas, tamén no auditorio municipal.
Idéntico espazo e horario no que o 15 de novembro proxectarase O que arde, a película do cineasta Oliver Laxe, e un día despois, Nova Escena Teatro representará As fillas de Eva.
O programa de actividades do Iescha completarase o venres 22 pola tarde e o sábado 23 pola mañá cunhas xornadas sobre a muller, que se desenvolverán na casa da cultura da capital chairega.
O mes de novembro pecharase cunha nova peza teatral, Arsénico por caridade, que será escenificada polos alumnos da escola municipal de teatro. A actuación será no auditorio, a partir das 21.00 horas.
