Un aparatoso accidente en As Pontes mobilizou a última hora da tarde deste luns aos efectivos de urxencias. O 112 Galicia recibiu o aviso ás 20.13 horas de que un vehículo saíra da vía na Pedra do Couto, na estrada DP1802 ao seu paso pola parroquia pontesa de Ribadeume, e envorcara.
Desde a central deuse aviso deseguido ao 061, á Policía Local, a Protección civil das Pontes e aos Bombeiros do Eume, aínda que finalmente non foi necesaria a intervención destes últimos, xa que o condutor do vehículo sinistrado —e único ocupante— logrou saír do coche polos seus propios medios. De feito, non perdeu a consciencia e, á espera da avaliación dos sanitarios, parecía atoparse ben e non presentaba aparentemente lesións de gravidade.
Foi requirida igualmente a presenza dunha ambulancia para o seu exame médico.