A Delegación do Goberno instou ao vicepresidente segundo e conselleiro de Economía e Industria, Francisco Conde, a que asine o protocolo de convenio de Transición Xusta das Pontes para, deste xeito, "avanzar no proceso de concreción dos novos investimentos na localidade", e pide ademais "unha maior implicación" da Xunta de Galicia.
A Delegación sinalou nun comunicado que, así, daríase "resposta ás demandas da comarca e dos traballadores da central térmica", e apuntou ademais que o conselleiro "cambiou o seu criterio sobre o futuro das Pontes", e pediu "concrecións".
Neste sentido, recordou que "esas concrecións levan meses encima da mesa sen que a Xunta firme o protocolo que permita estudar alternativas e investimentos". A Delegación "espera" que o cambio de criterio do conselleiro "permita desbloquear o convenio e, así, fixar novos investimentos que garantan os postos de traballo e fixar a poboación no rural".
A Delegación recordou que "esas concrecións levan meses encima da mesa sen que a Xunta firme o protocolo que permita estudar alternativas e investimentos"
A Mesa de Transición das Pontes reúne aos representantes do Ministerio para a Transición Ecolóxica e o Reto Demográfico, da Xunta de Galicia, do Concello das Pontes, da empresa titular da central térmica, da Asociación Empresarial das Pontes e dos sindicatos para "planificar accións conxuntas que aseguren unha transición xusta na zona".
O delegado do Goberno en Galicia, José Miñones, reiterou o compromiso do Executivo coas Pontes e coa Mesa para "o futuro da comarca, a única con carácter específico, á que corresponde a elaboración dun plan de desenvolvemento para atopar alternativas á actividade de xeración eléctrica con carbón tal e como viña desenvolvendo, entre outras actividades".
Tamén cualificou de "fundamental" a necesidade dunha unidade de acción institucional e sindical, polo que a decisión da Xunta de participar activamente neste órgano debe de ser ratificada cunha maior implicación do Goberno galego"
