Para optar a esta liña de subvencións presentáronse 26 proxectos, dos que finalmente se seleccionaron sete, mentres que outros once quedaron na lista de reserva. Ademais, catro propostas recibiron un informe desfavorable por parte da entidade e outras catro desistiron de optar ás axudas Leader.
O investimento total que realizarán os sete proxectos aprobados onte ascende a un millón de euros. Ademais, suporán a creación de cinco postos de traballo e a consolidación doutros 65 empregos.
Nestas iniciativas, hai dúas promovidas por entes públicos e cinco por entidades privadas. Entre estas últimas hai un proxecto para adecuar unha parcela e un edificio para almacén agrícola en Castro de Ribeiras de Lea; outro para a ampliación de instalacións e maquinaria nun centro autorizado de tratamento de vehículos na Pastoriza; a adquisición dunha máquina de manipulación de patacas en Vilalba; a habilitación dun centro de lavado e desinfección de cisternas en Guitiriz, e a dotación de equipamento para aumentar a produción dunha empresa cárnica en Riotorto.
En canto aos once proxectos que están en reserva, suman un investimento total de 1,3 millóns de euros, mentres que poderían recibir 536.000 euros de axudas, aínda que de momento non será así, á espera de se se abre unha nova partida orzamentaria dentro deste programa europeo para dar saída a algún proxecto máis.
Na reunión do venres estiveron presentes a presidenta do GDR Terra Chá, Fe Legaspi; o secretario, Jaime González; o secretario, José Antonio Sierra, e os alcaldes de Guitiriz, Marisol Morandeira, A Pastoriza, Primitivo Iglesias, Riotorto, Clemente Iglesias, e Vilalba, Elba Veleiro, ademais de varios particulares.
