A Garda Civil das Pontes detivo este xoves pola mañá a un veciño do municipio e un vello coñecido das forzas de seguridade por cometer varios furtos e un roubo na localidade.
O home, tras ser detido, solicitou unha revisión médica e foi ingresado no hospital de Ferrol, debido a que tiña unha lesión nun nocello desde facía días. Unha vez sexa dado de alta, pasará a disposición xudicial do xulgado número 2 de Ferrol.
Ao detido, ao que xa se investigou con anterioridade por sucesivos furtos -concretamente nunha panadería e noutro negocio local- acúsaselle de subtraer algo máis de 300 euros nun centro médico do municipio o pasado 22 de setembro e do roubo doutros 40 euros nun coche aparcado ao que, supostamente, rompeulle un portelo para acceder ao seu interior o día 28 do mesmo mes. Aínda que a cantidade non é moi elevada, neste caso considérase roubo e non furto polo uso da forza.
MÁIS CASOS. Nos últimos meses crece o malestar entre os veciños polos sucesivos furtos que se están cometendo nos negocios da localidade. Con todo, as cifras de delitos do municipio están moi por baixo da media provincial e estatal, con seis por cada mil habitantes, fronte aos 32 de A Coruña e os 46 de España.
