sábado. 21.05.2022 |
El tiempo
sábado. 21.05.2022
El tiempo

Os gandeiros mobilízanse en Vilalba para esixir que suba o prezo do leite

Protesta de los ganaderos en Vilalba. MARÍA ROCA
UU AA alerta dunha subida de custos no sector "sen precedentes"
 

Decenas de gandeiros galegos concentrábanse este mediodía ás portas da planta de envasado que a multinacional francesa Lactalis ten en Vilalba para reclamar unha subida do prezo do leite en orixe que cubra "unha subida de custos de produción sen precedentes", segundo informou o secretario de Coordinación Sectorial e Área Externa UU AA, Félix Porto, aos medios de comunicación.

Porto, que tomou a palabra nesta concentración, convocada por de Unións Agrarias, á que se sumaron outras organizacións como a Asociación Agraria de Galicia (Asaga) e o Sindicato Labrego Galego (SLG), dixo que "esta situación non ten precedentes" polo encarecemento dos custos.

Os gandeiros baleiran unha cisterna de leite  fronte a Lactalis. MARÍA ROCAAdemais, augurou que o prezo de determinadas materias primas necesarias para a produción nas granxas, "como abonos ou fertilizantes", pode seguir incrementándose "a medio prazo", probablemente "nos primeiros meses do próximo ano", e tampouco hai síntomas que fagan pensar nunha baixada do recibo da luz ou dos carburantes. "Cada vez estréitase máis a posibilidade de que as granxas deste país poidan facer rendible a súa actividade", insistiu o portavoz sindical, porque os gandeiros son incapaces de repercutir no prezo do leite esa subida "do 26%" rexistrada nos últimos meses nos custos de produción, o que levou ás explotacións a perder diñeiro.

Porto instou as industrias lácteas "a cumprir a Lei da Cadea Alimentaria", que determina que "ningún elo da mesma pode vender por baixo de custos de produción". Recordou que as industrias lácteas xa están a gozar de incremento de prezo por parte da distribución, así como da subida de cotización de produtos como a manteiga ou o leite en po, pero "mentres ven como se incrementa a súa conta de resultados", deixan cada vez máis "indefenso" ao sector produtor.

Segundo o portavoz sindical, esta situación está detrás do peche de 381 granxas en Galicia no último ano —entre setembro de 2020 e setembro de 2021—, de modo que neste momento quedan na comunidade autónoma "menos de 6.500 explotacións -6.476-", que constitúen a base dun "sector estratéxico" para a nosa economía.

Os gandeiros baleiran unha cisterna de leite  fronte a Lactalis. MARÍA ROCAEn canto á decisión de iniciar as mobilizacións ante a sede de Lactalis, afirmou que se trata dunha das "empresas con maior cota de mercado no estado español", de modo que as súas decisións marcan en certa medida o devir do mesmo. Tamén aclarou que a oferta de subida que lle fixo aos seus produtores, "dun céntimo de euro en litro", é "ridícula" e incluso "roza o insulto".

Pola súa banda, Juan Pérez, da Asociación Agraria de Galicia (Asaga), explicou que a posición predominante desta industria no sector provoca que "calquera movemento que faga esta empresa trasládese inmediatamente ao resto da industria". Asaga afirma que "os gandeiros de leite en Galicia e en España seguen coa auga ao pescozo".

"Os múltiples custos que deben afrontar para coidar ás súas vacas disparáronse nos últimos meses, e o prezo que obteñen polo leite non lles permite obter a mínima rendibilidade necesaria para seguir adiante". "Por todo iso, está a producirse un peche masivo de granxas lácteas", subliña esta organización agraria.

"O obxectivo das protestas é esixir ás industrias lácteas e á gran distribución que recoñezan a subida de custos e deixen de presionar e afogar" ao primeiro elo da cadea", engade.

Os gandeiros mobilízanse en Vilalba para esixir que suba o prezo do...
comentarios