Gadis acaba de inaugurar o renovado supermercado da Rúa de Galicia de Vilalba, que incrementou a súa superficie ata os 900 metros cadrados tras unha completa reforma que tamén permite "un importante incremento da oferta de produtos", tal e como destacan desde a firma.
"Funcionalidade, amplitude e comodidade son tres das características máis destacadas do establecemento", apuntan en Gadis, recordando que agora os clientes dispoñen de máis de 8.000 artigos, tanto de marcas recoñecidas como da marca propia Ifa.
O supermercado conta con seccións como pescadería, carnicería, charcutería, lácteos, froitas e verduras, adega, panadería, droguería e hixiene ou alimentación para mascotas, entre outros, ademais dunhas millas de referencias en artigos saudables, ecolóxicos, bio, sen lactosa, para veganos ou sen gluten.
Desde Gadis fan fincapé en que son máis dun milleiro os provedores locais que abastecen maioritariamente as seccións de produto fresco, recordando a súa aposta pola "presenza cada vez maior de produtos de quilómetro 0 nos lineais", o que reduce "as rutas de transporte e, polo tanto, as emisións de dióxido de carbono". Na reforma tamén se apostou pola redución do consumo enerxético, cun aforro de ata o 40%.
A renovada tenda, que abre de 9.00 a 21.30 horas e dispón de servizo a domicilio, estréase cunha promoción. Gadis sortea unha Thermomix e un Iphone XR entre os seus clientes, que ata o 5 recibirán un ticket para participar por cada dez euros de compra.
