A Fundación Manuel Fraga procedeu a trasladar este venres varios fondos desde o auditorio Carmen Estévez a unha nave cedida por un empresario vilalbés, tal e como confirmou José María García-Leira Boado, membro da entidade.
A inxente documentación, gardada en caixas, terá que ser catalogada, aínda que non se fixou se se fará na propia nave ou a medida que o material se coloque na sede da fundación, na antiga casa de Fraga, situada na céntrica Rúa da Pravia.
Os labores de traslado do material, que requiriron reservar espazo para un tráiler, espertaron o interese do PSOE vilalbés, que mostrou a súa sorpresa porque se realice esta actuación a apenas unha semana do cambio de goberno, aínda que García-Leira asegurou que se debía a unha casualidade, pois levaban tempo buscando colaboracións e apoios económicos para encher de contido a casa de Fraga.
O PSOE tamén preguntou ao alcalde, Agustín Baamonde, polos fondos. Este precisou que, aínda que levasen varios anos no auditorio, son documentos da fundación que dispón deles libremente.
