Unha foto dun grupo de bombeiros do parque comarcal de Vilalba en apoio á líder do PP de Lugo, Elena Candia
Na imaxe, sete bombeiros aparecen uniformados e diante do parque comarcal da capital chairega baixo a lema Viste como queiras e un lazo de leopardo superponse sobre a fotografía, o mesmo que utilizou o PP na súa campaña de apoio á presidenta provincial do partido.
A instantánea, que nun primeiro momento xerou dúbidas por se se podería tratar dunha posible montaxe e que incluso algúns bombeiros descoñecían, foi correndo como a pólvora de teléfono en teléfono, provocando os primeiros posicionamentos.
Tamén houbo reaccións de sorpresa ante unha reivindicación política utilizando o nome do parque comarcal e a imaxe do colectivo.
O sarxento xefe do parque, Tomás Losada, asegurou que só participaron nesa fotografía sete bombeiros do servizo situado en Vilalba, e confirmou que non era un posicionamento colectivo.
Os demais bombeiros –actualmente hai 19 en total no parque–, asegurou, desvincúlanse "completamente" de todo o que teña que ver con esa imaxe. "O resto non queremos situarnos a nivel político de ningunha parte", expresou Losada.
Desde o consorcio decidiron non facer ningún tipo de declaración sobre a fotografía, aínda que deixaron claro que aínda que oficialmente non tiñan constancia de nada si coñecían a imaxe. "O presidente xa pediu desculpas no seu momento e é un tema pechado", expresou a xerente do consorcio, Marta Rouco.
Tamén se pronunciaron no mesmo sentido desde o PSOE. A deputada provincial e portavoz Pilar García Porto asegurou que "o tema está zanxado dende o momento no que o presidente pediu desculpas" e incidiu en que a fotografía dos bombeiros é unha "acción a título individual, non unha acción conxunta".
Os parques de bombeiros están en plena negociación do convenio colectivo.
