ESTE luns foi un día moi especial para Daniel José López Legaspi, pois tras dous anos como vendedor da Once entregou en Meira o seu primeiro premio. O afortunado é un cliente habitual da localidade que levou máis de 6.000 euros co xogo Mi Día, segundo indican dende a Once. Como bo vendedor, Daniel José prefire non desvelar a identidade do afortunado.
Supoño que como vendedor estará contento de entregar un premio de 6.000 euros...
Por suposto, causoume moitísima alegría entregar este premio porque é o primeiro que dou. Levo dous anos como vendedor e estreeime este luns. Fíxome moita ilusión porque aínda que non é unha cantidade moi grande, neste tempos de crise que vivimos estou seguro de que ao afortunado lle alegraron o día.
O afortunado foi un cliente de Meira, sabe quen foi?
Aínda que o soubera non podería desvelar a identidade (risas).
En que consiste ‘Mi Día’?
É un xogo no que a persoa participante ten que escoller unha data entre as 36.525 comprendidas nun período de 100 anos. Ademais, cada combinación leva asignado automaticamente un número da sorte. O importe xogado por cada combinación é de un euro e os sorteos celébranse todos os luns e os xoves.
Onde ten o seu punto de venda en Meira?
Normalmente colócome pola praza e estou moi satisfeito polos clientes que teño.
Soe desprazarse a outras localidades da provincia?
Si, vou tamén a Pol, a Ribeira de Piquín, a Riotorto ou á Pontenova.
