Unha muller residente en Vilalba e o home que entón era a súa parella sentarán no banco dos acusados como supostos autores dun delito de lesións por imprudencia grave, despois de que se detectasen rastros de drogas no bebé de 16 meses fillo da acusada. Tras ser atendido no servizo de Urxencias, o pequeno deu positivo tanto en cannabis como en cocaína.
A Fiscalía solicita para ambos os investigados seis meses de prisión, aínda que no caso da nai engade tamén a retirada da patria potestade e a tutela do neno por un período de dez anos.
Os feitos que recolle a representante do ministerio público no seu escrito de acusación sucederon en setembro de 2018, cando os acusados acudiron ao servizo de Urxencias da PAC de Vilalba, sobre as 8.00 horas, para que fose atendido o bebé, que entón tiña 16 meses. O neno presentaba síntomas de rixidez, pausas respiratorias, beizos amoratados, somnolencia e pranto.
Os médicos detectaron trazas de cannabis nos ouriños do neno e de cocaína nunha análise de cabelo
Ante a gravidade da situación, o pequeno foi derivado a Urxencias do Hula, onde quedou ingresado na planta de Pediatría. Ao non mellorar co tratamento recibido, os médicos sospeitaron e realizaron un estudo de tóxicos nos ouriños, no que deu positivo en cannabis. Un posterior exame médico forense do cabelo do pequeno demostrou que tamén presentaba rastros de cocaína desde polo menos seis meses antes da toma da mostra.
Ante semellante cadro, os médicos ingresaron ao bebé na Uci para un lavado gástrico e para completar un tratamento a base de hidroterapia, osíxeno e sedantes. Estivo ingresado oito días.
O equipo médico deu conta ás autoridades do sucedido e o xulgado de Instrución 2 de Vilalba encargouse de realizar a investigación. Tras esta, a Fiscalía considera que hai probas de que a nai, C.M.G.M., e a súa parella F.C.S. eran consumidores activos de cocaína e que se drogaban en casa a pesar de que convivían co bebé.
Deste xeito, o pequeno foi exposto de xeito pasivo pero polo menos durante seis meses á contaminación por restos de drogas no mobiliario, o que facilitou a súa inxesta accidental, así como ao fume das sustancias consumidas. Segundo argumenta a fiscal, os acusados coñecían as consecuencias que podían ter os seus actos pero non adoptaron ningunha precaución para evitar a intoxicación do neno.
O pequeno foi levado a Urxencias con síntomas de rixidez, pausas respiratorias, beizos amoratados, somnolencia e pranto
Ante esta situación, acusa a F.C.S. dun delito de lesións por imprudencia grave e solicita para el seis meses de cárcere, ademais da prohibición de achegarse ou comunicarse co neno durante cinco anos.
No caso da nai, aprecia o mesmo delito, pero en concurso ideal con outro de abandono de familia na modalidade de abandono de menores. Ademais da pena de prisión, proponse que sexa condenada a unha inhabilitación para o exercicio da patria potestade ou tutela do neno durante dez anos, período no que tampouco podería achegarse ou comunicarse co seu fillo. Este permanece baixo tutela da Xunta desde os feitos.
