Fai algo máis dun lustro, xurdía na capital chairega unha nova cita cultural, o Vilalba Fusión, co que se quería mostrar a música que se realizaba entón na localidade. Por diversas circunstancias, aquela primeira edición non tivo continuidade, ata hoxe, cando a situación de alerta sanitaria a causa do coronavirus deulle unha segunda oportunidade.
Así, o Vilalba Fusión regresa coas pilas máis que recargadas e ofrecerá este venres e sábado, de xeito online, en streaming e gratis, preto dunha trintena de actuacións en horario de tarde e noite.
Seis grupos, dous cantautores e 15 DJ serán os encargados de amenizar este peche a través da web radio.8020lounge.es. Todo iso será mediante sesións pregrabadas ante a imposibilidade de facelo en directo.
A idea de recuperar a cita xurdiu por mor de que Moisés Martínez empezase a picar nunha radio caseira para animar a corentena
As agrupacións locais Irmandades do Falo, Magical Colors, Allan Craft e Buxos Verdes, de música tradicional, farán de anfitrións a outros grupos como Berta Franklin e Yao!. Tamén están confirmada a participación dos cantautores David Rodríguez 'Palomo', de Vilalba, e Pablo Navas 'Yeyo', de orixe madrileña pero fincada en Santiago de Compostela.
A eles únense nada menos que 15 DJ: Frisco&Marcos Peón, Miguel López, David Veda, David García, Diego Amido, Antonio Currás, Félix Jorquera, DJ Zalo, Alvarinho, Pedro Anido, Popy García, Adrián Martínez, Javier Martínez, Sito Click! e DJ Kiko.
Ademais, renderase tributo a tres bandas de rock vilalbesas que xa non existen: Postergel, Mi perro Vincent e Ed Gein Pills.
A recuperación do Vilalba Fusión xurdiu da man de un dos seus promotores de entón, Moisés Martínez 'Sito', quen, para matar o tempo na corentena, pensou en crear unha radio caseira para retransmitir online e animar o confinamento de todo aquel que quixese escoitalo.
"Teño o equipo en casa para iso e díxenme ‘imos probar'. Paréceme unha cousa que nos fai sentirnos moi preto uns doutros e máis nestes momentos, que nos fai falta", explica Sito, que recoñece que ao principio non contaba "con ter tanta repercusión", chegando a 300 oíntes, de toda Galicia e incluso de fóra de España.
"Primeiro collín un servidor gratuíto, pero a velocidade era escasa e había moitos problemas de cortes. Pero un gran amigo, Antonio Andina, que ten un negocio de informática, habilitoume un servidor de radio de pago de xeito altruísta e todo mellorou", explica.
Sito pica en directo, de 17.00 a 19.00 horas de luns a sábado, a música que lle van pedindo, con dedicatorias a maioría, os seus oíntes a través de WhatsApp e Facebook. O resto do día, deixa unha lista de reprodución.
Foi entón cando se lle acendeu a lámpada. "Pensei, se toco os contactos de DJ do festival, podemos montar algo guay. eles dixeron que si e púxenme a buscar grupos coa axuda de Luís Mato", comenta Sito, que destaca que todos colaboran de xeito altruísta nunha iniciativa "para quedarnos en casa e concienciar sobre iso e motivar e entreter á xente no peche". Apuntou que ademais se puxeron en contacto con el máis DJ, máis grupos e incluso xente de bandas que xa non están en activo para ofrecerlle as súas gravacións e participar tamén.
