Un home de 49 anos de idade, con iniciais V.M.A.P., natural do concello de Castro de Rei pero fincado na Pastoriza, resultou o luns ferido ao precipitarse ao chan desde unha árbore cando realizaba labores de poda nunha leira particular da parroquia de San Martiño de Corvelle.
Urxencias Sanitarias de Galicia desprazou ata o lugar unha ambulancia de soporte vital básico, acompañada dun equipo sanitario de atención primaria, así como o helicóptero do 061 con base en Santiago de Compostela, que foi o que se encargou de evacuar ao ferido ao hospital Lucus Augusti, onde este luns permanecía ingresado.
Os axentes da Garda Civil, ao chegar ata a leira onde se produciu a caída, constataron que o home estaba ferido pero consciente, segundo confirmaron desde a central de urxencias do 112 Galicia, que recibiu o aviso deste accidente ao redor das dez da mañá.
O alertante chamou solicitando atención para unha persoa que se caeu dunha árbore cando estaba a podar ramas, polo que rapidamente mobilizouse aos servizos do 061 e á Garda Civil. Tamén se alertou ao GES da Pontenova, aínda que finalmente non foi necesaria a súa intervención, ao atoparse o home nun lugar accesible e liberado.
