Un octoxenario, V.F.L., resulta ferido grave nun choque frontal, que tivo lugar minutos antes das 21.30 horas deste xoves, na estrada LU-541 á altura de Saavedra.
O ferido, veciño da parroquia begontesa, foi excarcerado polos bombeiros do parque comarcal de Vilalba. Segundo as primeiras informacións, sufriu un traumatismo torácico e foi trasladado nunha ambulancia medicalizada ao Hula.
No outro vehículo viaxaban dous ocupantes, unha muller que resultou ferida leve e tamén foi trasladada ao centro hospitalario, e o acompañante, que saíu ileso.
Ao lugar do suceso trasladáronse ademais tres ambulancias, membros de conservación de estradas e axentes do subsector de Tráfico de Lugo, que se encargaron de regular a circulación e desviala por un camiño paralelo, xa que o sinistro ocupou os dous carrís da vía.
