Un grupo de familias de Abadín rexistrou este luns no centro de saúde do municipio varios escritos, todos a título individual, para reclamar unha mellor atención pediátrica. Ademais desta medida, prevén recoller firmas para presentar no Sergas apoiando a súa reivindicación e xa se puxeron en contacto co Concello para que medie coa Xunta.
Os pais consideran insuficiente o horario de atención, que é de só dúas horas os xoves, de 9.00 a 11.00, e lamentan ademais que desde 2017 a persoa encargada da consulta nin sequera sexa pediatra, senón médico de familia, polo que piden que se amplíe o horario a varios días e se envíe un especialista.
Precisan ademais que "cando falta non se substitúe" e, en caso de querer ir a Vilalba, a onde os derivan, a cita só se pode pedir no mostrador antes das 9.00, o que os obriga a esperar toda a mañá a que o facultativo acabe de atender as citas previas.
"É un sen sentido, temos problemas por unha vacina ou un simple catarro e moita xente acaba indo ao privado e non debería ser así", din os promotores dunha reivindicación que suma o apoio da Anpa do colexio.
Pola súa banda, desde o Sergas din que o centro de saúde de Abadín "conta coa mesma atención pediátrica" que tiña, precisando que "sempre resolveu as necesidades asistenciais dos 107 nenos que forman a poboación pediátrica adscrita a este centro". Incídese ademais en que hai tres médicos de familia "totalmente capacitados para a atención dos nenos deste concello" o resto da semana.
