O octoxenario veciño de Labrada que este luns resultaba ferido de gravidade nunha colisión ocorrida nesta mesma parroquia guitiricense falecía onte pola tarde no hospital Lucus Augusti, onde permanecía ingresado na Unidade de Coidados Intensivos, ao non poder recuperarse das súas feridas.
O home, que perdeu a conciencia tras o forte impacto, fora evacuado ao hospital nun helicóptero de Urxencias Médicas tras ser excarcerado do vehículo que conducía polos bombeiros do parque comarcal de Vilalba.
Os restos mortais de José Antonio Carballeira Miraz serán velados a partir desta tarde no tanatorio de Momán (Xermade), onde trasladaranse unha vez realíceselle a autopsia. A data e hora do funeral, que terá lugar na igrexa de Santa María de Labrada, en cuxo cemiterio recibirá sepultura, están pendentes de fixar.
O accidente tivo lugar nun cruzamento da estrada LU-170, que une o Mesón da Cabra con Momán, á altura do quilómetro 14,500, minutos antes do mediodía. Nel víronse implicados o turismo da vítima, que ía só, e unha furgoneta, cuxo condutor e único ocupante, un home de 48 anos tamén natural de Guitiriz, sufría feridas leves.
