Unha persoa tivo que ser trasladada en ambulancia a un centro sanitario na madrugada do luns ao martes tras un incendio rexistrado nunha vivenda de Vilalba, na parroquia de Mourence.
[ Interior da vivenda afectada polo lume. BOMBEIROS DE VILALBA ]
A central do 112 Galicia recibiu o aviso, pasadas as doce e media da noite, a través da chamada do propio afectado, que alertaba de que se iniciou un incendio no seu domicilio mentres estaba a durmir. Nesa mesma comunicación afirmaba que podía saír da casa polo seu propio pé.
Con esta información, a central de urxencias deu aviso aos Bombeiros de Vilalba, aos do Eume, Protección Civil, Garda Civil e 061. Tamén foi requirida a colaboración da Central de Incendios, que enviou ao lugar dúas motobombas de Begonte e Guitiriz.
Cando os medios de extinción xa se dirixían ao lugar, o 112 recibiu un segundo aviso doutro particular, quen aseguraba que escoitara explosións na vivenda. Minutos despois, os axentes que xa se atopaban alí confirmaban que os residentes estaba ben e fóra da casa. A pesar diso, unha persoa tivo que ser trasladada en ambulancia, aínda que, segundo a central de urxencias, atopábase en bo estado. O afectado, un home de 59 anos, foi evacuado a un centro de Atención Primaria da zona.
En canto aos danos materiais, os Bombeiros explicaron que ardera o faiado e varias habitacións da primeira planta da casa.