Logo dun tempo en silencio, os transportistas do carbón encheron o acceso á praia do lago das Pontes cos seus camións para dar unha mensaxe clara, loitar unha vez máis polo seu futuro e esixir unha transición enerxética xusta.
"Non estamos nin acabados nin parados e avisamos: imos seguir pelexando e pódense volver cortar estradas e autoestradas", explicou o portavoz do colectivo, de transportistas, Manuel Bouza, tras porse en marcha unha mobilización sorpresa que invadiu de vehículos o lago o venres pola noite.
"Temos promesas incumpridas da Xunta de Galicia e do Goberno de España e sen facer dano queremos facernos ver, visibilizar a nosa situación, que non é nada fácil", di Bouza, que recorda que o transporte do carbón deixou de traballar tras o parón da central térmica das Pontes "hai xa ano e medio".
A reivindicación, que chegou dunha forma moi visual cunha serpenteante caravana duns cen vehículos pesados que onte acapararon as miradas de moitos veciños e visitantes, organizouse este fin de semana para que coincidise coas probas con biocombustibles que Endesa está a desenvolver na central térmica e que poderían determinar o futuro da planta.
Os camioneiros do carbón foron os primeiros en notar as consecuencias do parón da central térmica e realizaron multitude de mobilizacións ao longo destes meses, incluídos peches en varios concellos, e as perdas son moi cuantiosas.
"Foise caendo moita xente, a situación é moi complicada. Uns 20 camións, polo menos, xa faltan, e moitos se malvendieron, e co paso do tempo haberá máis renuncias", indica Manuel Bouza.
"Que subas 15 días carbón para as probas non soluciona nada e os lodos -que transportan desde as instalacións de Agroamb, no concello chairego de Castro de Rei-, tráelos con dez camións, tampouco resolven nada en canto a perdas. Necesitamos solucións", di o portavoz do colectivo de camioneiros, á vez que recorda que se garantiron axudas que nunca chegaron.
Polos seus cálculos, cada camión parado supón neste momento perdas de entre 30.000 e 40.000 euros ao ano para os transportistas do carbón, que deixan de ingresar, di, uns 130.000 euros ao ano.
Os camións, tras dúas noites no lago, empezaranse a retirar este domingo a última hora da tarde do lugar. "Entre hoxe e mañá pola mañá estarán todos fose", indica Bouza, que asegura que haberá máis mobilizacións.
