A primeira Escola de Carniceiros de Galicia está dando xa os seus primeiros pasos nas instalacións habilitadas polos seus promotores na sede da empresa Megaro Foods, no polígono industrial de Castro de Ribeiras de Lea, onde conta cunha aula para impartir as clases teóricas e un taller-obrador para desenvolver os ensinos prácticos.
O presidente da Fundación Agroalimentaria Galega e xerente de Megaro Foods, Carlos Cebrián, que é o promotor deste proxecto, explica que a escola xa impartiu "algúns cursos privados, en colaboración con Cruz Vermella" e este fin de semana está previsto "un curso-taller para carniceiros especializados, que será impartido por docentes específicos que virán desde Barcelona".
"Estamos a planificar os obxectivos e organizando a programación dos cursos", apunta Cebrián, porque hai que establecer os grupos en función da capacidade das instalacións e da normativa Covid que afecta á organización das actividades lectivas.
Este centro de formación nace, segundo o empresario, para responder "a unha carencia que ten o sector industrial e a distribución", porque "falta persoal cualificado, que a industria necesita pero non atopa no mercado laboral".
Cebrián asegura que "existe nestes momentos unha gran bolsa de traballo", de modo que se abren moitas posibilidades para desenvolver esta profesión a quen complete a formación que oferta Escola de Carniceiros de Galicia.
Cebrián indica que o obxectivo é formar man de obra cualificada e, ao mesmo tempo, "darlle un futuro a persoas que están en paro ou buscan o seu primeiro emprego", porque existe "esa carencia na actualidade" no mercado laboral.
A Escola de Carniceiros de Galicia naceu coa Fundación Agroalimentaria Galega e integrada na súa estrutura, grazas ao impulso de varias empresas lucenses e da Confederación de Empresarios de Lugo (CEL), que buscan con esta iniciativa xerar sinerxías para favorecer a creación de valor engadido a partir das producións primarias de Galicia.
