Os donos dun bar das Pontes, situado na Avenida de Lugo, denunciaron este mércores na Garda Civil que sufriran un roubo de madrugada no seu local.
"Decatámonos polo ruído, foi sobre as catro da mañá, pero cando baixaron os meus fillos xa escoitaron o coche que se ía", di a dona do local, que vive no piso de arriba, á vez que indica que os ladróns accederon ao interior do bar rompendo un dos cristais das fiestras.
"Levamos 35 anos aquí e xa sufrimos varios roubos", di a responsable do local, á vez que cifra nuns 3.000 euros os danos e o botín que levaron os cacos.
"É un problema agora, non hai municipais pola noite, chamamos ao 112 e veu a Garda Civil, que estaba en Ares ás 09.00. Co orzamento deste Concello debería haber seguridade", sinala.
