Endesa está a levar a cabo a revisión programada da central de ciclo combinado de As Pontes, unha parada que se aproveitará para realizar melloras que contribuirán a que as instalacións gañen "fiabilidade e dispoñibilidade" e que implica a contratación de 280 profesionais de 40 compañías distintas.
As tarefas que estes acometen, xa de seu complexas, viron incrementada a súa dificultade ao engadirse ás pautas habituais de riscos laborais "un amplo dispositivo de medidas para previr os contagios por coronavirus", tal e como precisan desde Endesa.
Os traballos teñen un orzamento de 29,5 millóns e durarán uns 60 días, polo que a finais de novembro espérase retomar a produción.
As labores de mantemento inclúen inspeccións nos compresores, a turbina de vapor, que será desmontada, e as dúas turbinas de gas, nas que se cambiarán álabes e cámaras de combustión, entre outros equipos. Ademais, está programada unha inspección robótica dos tres alternadores, nos que se farán test de ensaio e verificación. A revisión contempla tamén comprobar os equipos auxiliares: das bombas de circulación, de circuíto pechado, de circuíto aberto e sen carga, dos interruptores de xeración e de motores, entre outros. En canto á caldeira, supervisarase co uso de drones.
No tocante ás melloras, actualizarase o sistema de control da central, con novas capacidades fronte a posibles ciberataques, e suprimirase a opción de consumo de combustible líquido en caso de carencia do gas natural, xa que esta non se produciu e ademais non é unha posibilidade ambientalmente sostible.
Endesa modernizará tamén os sistemas de excitación das turbinas e as súas arrancadores estáticos e redeseñará as válvulas de bypass de vapor da turbina cara ao condensador. Ademais, reducirá os tempos e custos de arranque para que a central gañe flexibilidade "agora que o crecemento da eólica demanda grupos capaces de absorber os ocos de produción que as enerxías renovables non poidan cubrir", puntualizan.
A central, ademais de contribuír á subministración eléctrica nacional, "xoga un papel moi destacado como respaldo ao numerosos parque eólicos instalados no norte de Galicia", segundo destacan desde Endesa.
O gas natural do que se abastece para operar chega ás instalacións pontesas a través dun gasoduto que enlaza coa regasificadora de Mugardos.
Son os megawatts de potencia instalada que ten a central de ciclo combinado das Pontes.