O Xulgado do Social número 2 de Lugo ditou un auto de execución no que obriga ao Concello de Guitiriz a abonarlle o seu salario a un traballador do GES da localidade, cuxo despedimento foi declarado nulo por sentenza xudicial, ata que o Tribunal Superior de Xustiza de Galicia (TSXG) resolva o recurso presentado pola Administración local.
Segundo informou a CIG, o Concello de Guitiriz negouse a readmitir a este traballador despois da sentenza do Xulgado do Social de Lugo que declaraba nulo o seu despedimento e amparouse, para tomar esta decisión, en que presentou recurso contra esa resolución ante o TSXG.
Por iso, aclara o sindicato, o traballador viuse na obrigación de presentar ante o propio Xulgado un escrito para reclamar a execución de sentenza.
Citadas ambas as partes, o Xulgado ditou un auto no que obriga ao Concello a pagarlle ao traballador o salario correspondente desde a data da sentenza -17 de abril de 2018- e ata que finalice o recurso interposto polo Concello.
Ademais, “o traballador queda exonerado de prestar servizos, debido a que así o quixo o Concello”.
