O programa Educando en Familia, herdeiro do desaparecido Preescolar na Casa e que o pasado curso contou coa participación de 350 familias da zona norte da provincia de Lugo, iniciará en outubro un novo curso, aínda que o fará de forma extraordinaria, só coa asistencia de persoas adultas. A pesar dos cambios e adaptacións e o esforzo que lle supón a todos os implicados, queren retomar a actividade para mantela viva e que as familias "non perdan o fío".
Tres mestras orientadoras, Encarna Santos e Fany Eijo, na zona da Mariña, e Ana María Vázquez, na de Terra Chá, son as responsables da coordinación das reunións semanais que se organizan nun total de 16 municipios. E aínda que tradicionalmente os grandes protagonistas destas eran os menores de seis anos, sempre acompañados de polo menos un adulto da súa familia, este curso, por prevención fronte ao coronavirus, optouse por programar talleres e sesións para pais ou outros familiares.
Si manteñen aberta a posibilidade de organizar algunha actividade que implique os máis pequenos, como mínimo unha vez ao trimestre e incluso con máis frecuencia se se ve factible. Os menores só se incorporarían de forma regular aos encontros semanais se se estima que é seguro.
ONLINE. As mestras reforzarán a programación presencial con contidos online, que se publicarán no blogue da www.educandoenfamilia.org, tal e como xa se fixo durante o estado de alarma. Desde marzo a xuño, compartiron propostas similares ás que se abordan nas clases regulares: os pais como educadores, desenvolvemento da comunicación, afectivo social ou cognitivo.
Os novos protocolos tamén obrigaron ao programa, que se desenvolve grazas a convenios de colaboración cos distintos concellos nos que se realiza, a modificar o lugar de celebración das reunións. Moitas delas eran en centros educativos, pero as estritas medidas de control de acceso a estes levou a que se opte por recolocalas noutros espazos públicos. Esta semana haberá reunións informativas neles para explicar as novidades.
