A terceira edición de Bfaero, a aceleradora de proxectos aeroespaciais no aeródromo de Rozas, en Castro de Rei, deu a coñecer as sete iniciativas gañadoras deste ano, entre as que se atopan o desenvolvemento de drones para o control de verteduras e para a distribución de produtos sanitarios.
O vicepresidente económico da Xunta, Francisco Conde, participou este martes en Lugo na presentación destes proxectos, catro dos cales veñen de fóra de Galicia -dous Madrid, un de Alacante e un de Zaragoza-, mentres os outros tres son de A Coruña, Vigo e Pontevedra.
Conde subliña a "boa noticia" que supón Bfaero para a captación de talento e a creación de emprego, "un camiño que vén a sumar dentro do campo produtivo".
As dúas primeiras convocatorias deste programa supuxeron a mobilización de 3,6 millóns de euros, con 63 empregos creados e cinco empresas constituídas.
A Xunta destaca que o Polo Aeroespacial de Galicia, que conta en 2021 con 20 millóns nos orzamentos galegos, é un dos 108 proxectos presentados para optar a fondos europeos.
SETE PROXECTOS. Dos sete proxectos, catro están en fase de aceleración: el CIES Solar, de Pontevedra, buscará realizar misións automáticas de fotogrametrías de máis de 1.000 hectáreas ao día; Saqqarah, de Vigo, servirá para a inspección de procesos industriais e verteduras ambientais; PrimeCor, de Alacante, desenvolve un sistema seguro e certificable para o control de voo de drones; e Atom, de Madrid, ofrece unha ferramenta integral para o uso de drones en operacións e mantemento de instalacións industriais.
Pola súa banda, os tres proxectos de incubación serán: Dronesuit, da Coruña, unha plataforma cloud con ferramentas para facilitar a operación e administración; Pharmadron, de Zaragoza, que avanza no uso de vehículos non tripulados no sector da loxística e distribución do sector da saúde; e SolarBotix, de Madrid, que estudará a viabilidade da fabricación de placas solares mediante tecnoloxías de fabricación de compostos para que poidan modelarse en superficies non como planas como as dos avións.
