O Concello de Guitiriz estrea nesta primeira quincena de agosto o seu primeiro campo de traballo, no que unha ducia de voluntarios internacionais realizarán labores culturais e ambientais, colaborando no Festival de Pardiñas e na Romaría Labrega da Chaira Os Vilares, entre outras actividades.
"É un pracer que esteades aquí, temos que agradecervos que decidades vir achegar o voso granito de area e esperamos que a vosa estancia sexa proveitosa e exitosa", afirmou a directora Xeral de Xuventude, Participación e Voluntariado, Cecilia Vázquez, na recepción aos participantes, á que asistiron a subdirectora do departamento, Yolanda Otero; a xefa de servizo en Lugo, María Grandío, e a alcadesa de Guitiriz, Regina Polín.
A rexedora agradeceu a implicación da Xunta para facer posible esta "experiencia piloto" e ofreceu aos mozos, aos que animou a deixar o seu "sinal aquí", nocións sobre un municipio con 5.500 habitantes, 310 núcleos e preto de 300 quilómetros cadrados, cuxos principais recursos son a auga, o granito, a gandería, a torta de millo ou a baixa contaminación lumínica.
Esta é unha rexión marabillosa, máis verde e cunha cultura local moi rica, que se pode comparar con Bretaña
Os voluntarios teñen de 19 a 26 anos e proceden de diversos puntos de España, así como de Francia, Italia, Ucraína e México. Para a maioría, este é o seu primeiro campo de traballo, no que se apuntaron "porque quería facer voluntariado este verán, vin este, gustoume e apunteime", como Sara, de Estremadura. A Javier, un scout madrileño, que quería "facer unha actividade distinta", chamoulle a atención "o dos festivais", mentres que ao seu homónimo mexicano interesáballe "coñecer unha cultura diferente".
A primeira impresión é boa, como confirman Marianna e Geraldine, de Italia, interesadas pola cultura local e sorprendidas pola natureza e o frío. "Esta é unha rexión marabillosa, máis verde e cunha cultura local moi rica, que se pode comparar con Bretaña", apunta o francés Enmanuel, un dos veteranos. O seu primeiro campo foi "un choque", e agora repite desde un punto de vista máis análitico esperando aproveitar a experiencia no seu traballo. Outra veterana é a alacantina Gisela, que tras dous campos ambientais, "quería seguir pero cambiar, e como este tiña as dúas cousas, chamoume a atención".
Nos próximos días e coordinados por tres monitores, os voluntarios, que pasan a noite no CMT de Santa Cruz de Parga, buscarán crear sinerxías coa poboación e farán tarefas como retirar especies invasoras ou concienciar sobre a reciclaxe selectiva. Ademais, gozarán de rutas de sendeirismo ou visitas á Serra da Capelada, A Coruña, Santiago ou distintos puntos de Lugo, como Viladonga.
A Xunta impulsa este verán 28 campos de traballo en Galicia. Lugo acolle sete: en Ferreira de Pantón e A Pobra do Brollón están en marcha, en Quiroga e Folgoso do Courel foron en xullo e en Portomarín e Xermade serán na segunda quincena. Os voluntarios galegos dispoñen de 925 prazas en 27 países e os campos galegos acollen a 598 persoas de fóra de Galicia.
