Doce mergulladores estudan a biodiversidade do lago das Pontes

Unha ducia de mergulladores do C.A.S. Nautulis de Fene e o C.A.S. Nauga da Coruña, ambos os pertencentes á Federación Galega de Actividades Subacuáticas, mergulláronse o domingo no lago das Pontes para realizar un estudo da biodiversidade dun espazo que aínda non alcanzou os dez anos de historia. O lago artificial pontés, que ocupa o oco que albergou a antiga mina de lignito local, comezou a encherse en xaneiro de 2008 e finalizou en abril de 2012, cando a lámina de auga alcanzou o seu punto de soborde, situado nos 332 metros sobre o nivel do mar.

"Xa estiven a mergullar no lago outras veces e fixemos incluso algunhas actividades con nenos, coñecíao un pouco pero o lago é inmenso", dicía recentemente saído da auga David Deibe, campión galego de vídeo submarino, mentres explicaba que, a pesar de que no seu caso non viu ningún animal durante a inmersión, si moita vexetación. "Pola zona na que estiven hai varias especies de alga diferentes e vimos un bosque de antigos toxos e xestas onde tamén fixemos fotos", explicou.

Igual que el, o resto de mergulladores, que se queixaban do frío ao saír –normalmente fálase da boa temperatura do lago pero onte os mergulladores, que baixaron entre os 15 e os 20 metros de profundidade, falaban de nove graos baixo a auga– atopáronse moi pouca fauna, pero si numerosa vexetación, sobre todo algas.

"Puidemos contar cinco ou seis especies diferentes de algas", dicían Guillermo e Ramiro Tato, da Rede de Estacións de Bioloxía da Universidade de Santiago (USC), quen destacaban "un sedimento totalmente diferente" no lago e moito máis uniforme que no mar.

Non foi a única diferenza que sinalaron os mergulladores: "No lago non hai correntes e hai máis claridade da auga, o que dá menos sensación de profundidade". As dimensións, unha vez que un está baixo a auga, tampouco impresionan, aseguraron mergulladores afeitos ao mar.

"Este lago é relativamente recente, hai que darlle tempo a que empecen a asentar as comunidades de fauna e flora", indicaron os membros da USC, que agora porán en conxunto todas as imaxes captadas baixo a auga para o estudo da biodiversidade.

O lago das Pontes, con 547 hectómetros cúbicos de auga, ten un perímetro de 17,5 quilómetros, con cinco de longo e 2,2 de ancho, e unha profundidade que alcanza os 206 metros.

A xornada deste domingo, á que tamén se sumou a concelleira de turismo, ElenaLópez, que se puxo o equipo de submarinismo para ver o lago desde dentro, foi un primeiro contacto do que poderá ser unha colaboración máis ampla para seguir co estudo da flora e a fauna do lago.