A Deputación Provincial de Lugo iniciou este luns as obras de strong arranxo do firme na ponte de Uriz, en Begonte, tras a aparición dunha focha na noite do pasado martes. Para garantir a seguridade viaria durante as obras, procedeuse a pechar ao tráfico o tramo afectado —o punto quilométrico 1,100 da estrada LU-P-5101—, cos desvíos correspondentes sinalizados.
Estes sinais foron colocados na rotonda do polígono industrial de Rábade, no cinto comarcal de Begonte e nos accesos procedentes dos núcleos de Penas de Rodas, Begonte, Outeiro de Rei e Friol.
As obras, que se acometen con cargo ás tarefas de conservación da rede viaria provincial, terán un custo aproximado de 10.000 euros e consistirán no "baleirado e rexeneración con formigón de parte da calzada afundida e o posterior aglomerado". O organismo provincial prevé que as actuacións finalicen nun prazo aproximado de dez días, tras o cal quedará normalizada a circulación.
Na última semana, mentres non empezaron as obras, restrinxiuse o paso de vehículos de máis de 10 toneladas de peso e limitouse a velocidade a 40 quilómetros por hora na zona afectada.