O pleno da Deputación da Coruña aprobou este venres dúas mocións, presentadas polo PSdeG-PSOE e o PP, demandando que se manteña a actividade nas centrais térmicas das Pontes e Meirama.
Na presentada polo grupo socialista, que se aprobou cos votos favorables de PSOE, BNG, Compostela Aberta, Marea Atlántica e Alternativa dos Veciños e a abstención do PP, demándase a Naturgy que realice na central de Meirama, en Cerceda, os investimentos que sexan necesarios para adaptarse aos requirimentos da directiva de emisións industriais da Unión Europea e que permitan a continuidade da central como mínimo ata 2045.
Ademais, o texto da socialistas demanda á Xunta e ao Goberno central "todo o apoio que sexa preciso para que as centrais térmicas das Pontes e Cerceda continúen coa súa actividade de xeración eléctrica como mínimo ata o ano 2045".
A moción do PP, aprobada cos votos do BNG e Alternativa dos Veciños, o voto en contra do PSOE e as abstencións de Marea Atlántica e Compostela Aberta, solicita o mantemento da actividade, esixindo ao Goberno "implicación, apoio e compromiso orzamentario para facilitar ás empresas titulares a modernización das instalacións".
"Compartimos a moción do PP, pero non podemos pedir ao Estado que estableza axudas económicas para que as centrais térmicas se adapten á normativa europea, sería enganarnos a nós mesmos e ás poboacións afectadas", expuxo o presidente provincial, Valentín González Formoso, sobre os argumentos en contra dos socialistas a este texto.
