O presidente da Deputación de Lugo, Darío Campos, que compareceu en rolda de prensa acompañado da alcaldesa de Gutiriz, Regina Polín, anunciou unha nova residencia para maiores na provincia, que se emprazará na Casa da Botica tras aprobarse dita obra na xunta de goberno deste venres.
Segundo explicaron, destinarase a esta infraestrutura 1,6 millóns de euros, dos que 1,4 achega o goberno provincial e 200.000 o Concello. Campos estimou que as obras poden estar adxudicadas nos primeiros meses do próximo ano 2019.
Aquí só irá a residencia de maiores, dado que o Concello acondicionou para centro de día a que se coñece como Casa dos Camineros e que funciona desde hai xa algún tempo como tal.
Ademais, Campos concretou que "o edificio contará con tres plantas con todos os servizos necesarios e 26 habitacións, que poderán ser dobres, o que podería levar a contar con 52 prazas". O presidente provincial agradeceu a "perseveranza" da alcaldesa, e sobre todo dunha plataforma veciñal Falando Claro, que leva loitando por esta residencia, con localización na Casa da Botica, desde 2009.
Pola súa banda, a alcaldesa de Guitiriz, Regina Polín, mostrou a "satisfacción" pola obra, que chega a modo de "Papá Noel", e que ela xa reivindicara na lexislatura do 11 ao 15 cando o goberno municipal do PP descartaba este emprazamento.
Polín apelou a que case a metade da poboación, dos 5.000 veciños sobre 2.000, contan cunha idade que pasa os 65 anos. Tamén fixo un repaso do inmoble, "o edificio máis importante de Guitiriz", comentou, que foi farmacia e rebotica e propiedade dun "familiar" do expresidente do Goberno Mariano Rajoy.
