O triste día de feira de Castro que se viviu este mércores, con moi pouca afluencia de xente e aínda menos postos de venda, xustificábase con opinións para todos os gustos, pero dúas razóns coábanse en todas: o virus e a choiva. Unha combinación que frustrou a boa marcha que levaba esta cita, que volvía asentarse no calendario chairego tras regresar coa fase 1 da desescalada. E aínda que o verán xa se auguraba "diferente", a cita co polbo volvía ser case" o que era.
Pero este mércores amencía como poucos de agosto, cunha incesante choiva que augou o día ata aos optimistas. E as últimas noticias sobre o brote de Covid-19 entre os traballadores os invernadoiros de Begonte e Cospeito que residen en Castro Ribeiras de Lea, non mellorou as expectativas.
"Polo mal tempo non foi, a xente viña igual comer o polbo, é máis polos positivos en coronavirus", aseguraban desde a pulpería Maciñeiras, e engadían que os máis habituais nas últimas feiras son "xente de fóra, que está de vacacións; os de aquí son os que máis están a privarse". Así o compartía Aurora Gómez, pulpeira de Santa María de Arcos (O Carballiño) que, ademais, apuntaba que "esta feira, a de despois das festas, era a máis grande do ano, porque viñan as familias a comer aquí", pero este mércores eran poucas as que se animaban. E cifran a asistencia entre un 30 e un 40% inferior á habitual.
En cambio, os escasos postos de roupa, enxoval e produtos de alimentación —que a pasada semana ocupaban todo o perímetro da carballeira de Castro e nesta non chegaban nin aos 20—, achacaban o descenso "considerable " de vendas ao mal tempo. "Incluso houbo varios que montaron o seu posto, pero ao chover tanto se foron", dicía José Díaz, acubillado no seu posto.
Entre os vendedores de xénero do sector primario, a sorte foi a mesma e varias voces apuntaban que "as feiras de despois do confinamento foron mellor ca esta, polo menos había vendas" e aquí todos culpaban, de novo, ao tempo invernal e ao temor a un virus invisible que "está aí".
Con todo, entre os veciños de Castro impera unha certa calma tensa fronte ao medo, e é que aínda que "de momento, non hai motivo para a alarma con só seis casos, concentrados e controlados", dicía o rexedor, Francisco Balado, o certo é que se perciben menos paseos polas rúas e "algo de preocupación", tal e como confirmaban desde o bar Suso —un dos establecementos que xa foi desinfectado polos operarios do Concello—, testemuña en primeira liña dun día de feira marcado polo baleiro.
