Os atrasos nos pagos das nóminas aos traballadores de Ingemarga, histórica firma de granito de Guitiriz, levou este mércores ao presidente do comité de empresa, Carlos Antonio López Mazorra, a plantarse diante das instalacións co obxectivo de pasar alí o día para visibilizar os problemas económicos que afronta o persoal. Pero a súa protesta durou menos do que el mesmo esperaba e dúas horas logo de iniciala —chegou á entrada da fábrica ao redor das 11.00 horas— foi desaloxado pola Garda Civil.
“Estaba eu só, sen meterme con ninguén, pero o director xeral chamou á Garda Civil. A miña idea era quedarme todo o día, por min e polos meus compañeiros, porque estamos nun momento no que non poden facer concentracións, nin sequera asembleas”, di o presidente do comité de empresa, que critica que levan moito tempo “con atraso no pago das nóminas”, que chegan desde 2012, di, “tarde e totalmente a contagotas”.
“Cobramos unha parte da de marzo, pero nos falta a outra parte, débennos a nómina enteira do mes de abril e unha paga extraordinaria”, indica Mazorra, que cifra nuns 2.700 euros o que a empresa lle debe a cada traballador. “E aparte hai unhas débedas concursais e preconcursales que a empresa estaba obrigada a pagar”, sinala, e fala doutros 60.000 euros aproximadamente en total.
Na actualidade, na planta de Guitiriz hai 114 traballadores, 128 en total na empresa, repartidos por outros puntos de España.
A planta guitiricense, que só deixou de producir entre o 30 de marzo e o 9 de abril dentro do estado de alarma, presentou un Erte de forza maior pola crise sanitaria
A granitera de Guitiriz leva anos de dificultades e chegou a entrar en concurso de acredores no ano 2018 tras unha declaración de insolvencia. “O administrador concursal deixou as contas totalmente saneadas e Ingemarga recibiu máis de dous millóns do Igape e doutras administracións e xa volve haber problemas económicos, non ten sentido”, denuncia o presidente do comité de empresa.
A planta guitiricense, que só deixou de producir entre o 30 de marzo e o 9 de abril dentro do estado de alarma, presentou un Erte de forza maior pola crise sanitaria. “Dixéronnos que ía ser para o 100% do persoal pero, cando empezaron a repartir as cartas, a nosa sorpresa foi que só era para un 35% dos traballadores”, indica Mazorra, que explica que a empresa xa lles adiantou que ía propor outro Erte por causas económicas unha vez finalice o actual. “Ese Erte vai sen acordo co comité de empresa”, resalta.
