A queixería vilalbesa Daniberto participa nun proxecto de carácter nacional, coordinado polo centro tecnolóxico agroalimentario Asincar, que pretende revalorizar e dar novos usos ao lactosuero das queixerías artesanais. Esta iniciativa, que financia o Fondo Europeo Agrícola de Desenvolvemento Rural (Feader) e o Ministerio de Agricultura, Pesca e Alimentación, tamén tratará de atopar novas fontes de ingreso para os pequenos produtores de queixo, cos que poidan mellorar a súa competitividade no mercado.
"Hai cousa dun ano chamáronme uns amigos asturianos para participar neste proxecto, e non o dubidei, estou encantado", explicou Daniel Pérez, quen este xoves exerceu de anfitrión en Vilalba nun encontro no que "quedou aprobado e definido o proxecto definitivo" e onde os asistentes puideron coñecer ademais as instalacións de Daniberto.
Logo de constituír oficialmente o grupo, no que a queixería chairega será a única representante galega, o seguinte paso será "estudar de que xeito e onde poderemos aproveitar e dárlle novos usos ao soro das nosas queixerías", indicou Pérez.
E é que o seu propósito é, nun prazo dun par de anos, producir e sacar ao mercado novos produtos saudables que conteñan soro e que reduzan a contaminación, e entre os que poderían estar bebidas refrescantes ou enerxizantes, leites fermentados ou derivados lácteos e ata xeados, snacks ou xelatinas.
INTEGRANTES. Nesta iniciativa tamén colaboran o Instituto de Produtos Lácteos de Asturias; a queixería Os Caserinos, de Asturias; a gandería Los Tiemblos, de Cantabria; Dulce Grado, empresa asturiana agroalimentaria que fabrica diferentes sobremesas e lácteos; a Asociación de Queseros Artesanos del Principado de Asturias e a Asociación Nacional de Queseros Artesanos.
