sábado. 26.09.2020 |
El tiempo
sábado. 26.09.2020
El tiempo

Dan positivo tres dos 50 xornaleiros illados polo gromo de coronavirus en Castro

Edificio no que se illaron os xornaleiros en Castro. SILVIA IGLESIA
Edificio no que se illaron os xornaleiros en Castro. SILVIA IGLESIA

Medio cento de temporeiros están confinados nun inmoble da localidade

Os casos positivos do gromo de coronavirus detectado en Castro de Ribeiras de Lea elévanse este martes a cinco, todos eles xornaleiros. Medio centenar están illados nun inmoble da localidade, unha medida adoptada despois de que na tarde do domingo se diagnosticase a un traballador que presentaba síntomas. A ese caso inicial sumáronse dous este luns e outros dous este martes.

Os temporeros illados, das decenas que se trasladan cada ano á comarca chairega para recoller froitos vermellos, conviven nun edificio céntrico que se estreou esta tempada como nova residencia para os xornaleiros. Hai máis traballadores da froita residindo noutros dous antigos hoteis da localidade chairega, o Cóndor e o Tojo. En total, entre o tres inmobles, estímase que suman na actualidade máis dun centenar de persoas, aínda que desde a empresa descartaron facer declaracións. 

Equipos do Servizo Galego de Saúde desprazáronse na mañá do luns ao lugar no que foron illados o medio centenar de traballadores para realizarlles a todos as probas (PCR). 

O modo de vida dos temporeiros, que comparten non só traballo, senón tamén vivenda, comidas e desprazamento en autobús a diario ata o seu posto de traballo, fai temer que poida haber máis positivos, polo que o previsible é que as probas se realicen co paso dos días a todos os traballadores da empresa. 

O Sergas comezou este luns a facer as probas PCR e ten acoutados os contactos do primeiro contaxiado, descuberto na tarde do domingo

INCERTEZA. A noticia dos positivos por coronavirus correu como a pólvora e a última hora do domingo os bulos xa se empezaron a facer máis grandes, falando algúns incluso de 80 contaxios nos invernadoiros, unha cifra moi afastada á realidade cando en toda a provincia había 75 casos activos. 

Na localidade, que este luns amencía parada nun inusual festivo que en condicións normais daría fin a unhas patronais canceladas este ano debido á crise sanitaria, os veciños estaban á expectativa e rodeados da incerteza.

"A xente ten algo de desconfianza. Pero non creo que haxa un gran risco ou preocupación mentres non se saiban os resultados das probas", valoraba o rexedor de Castro de Rei, Francisco Balado, que pola mañá descartaba falar de gromo polo momento. 

"Se se desprenden moitos contagios, haberá alarma e a xente vaise a asustar, pero xa houbo máis casos ao principio da alerta sanitaria, no xeriátrico e no centro de dano cerebral e algún outro en San Xiao de Mos ou en Castro de Rei, e saímos", dixo o alcalde, mentres incidiu en que, na actualidade, a xente está "máis preparada", co uso xeneralizado de máscaras e coa distancia física máis interiorizada. 

"Se hai un, haberá máis contaxios", dicían os poucos que este luns paseaban por Castro. "Viven moi xuntos e é complicado controlalo cando comparten tantas horas", engadían outros á espera de máis noticias. 

Os temporeiros son man de obra regularizada. Teñen os papeis, contratos de traballo e empadróanse nos concellos onde residen, e aínda que a súa integración non é total, empezan a ser rostros habituais do comercio —sobre todo de alimentación— ou a hostalería local. 

A empresa, Surexport, fundada en Huelva, ten unha planta de embalaxe no polígono de Castro e invernadoiros no Arneiro, no concello limítrofe de Cospeito, e produción en Pacios, en Begonte. Nas épocas de máis traballo, de maio a setembro, alcanzan os 400 temporeros de países como Rumaría, Bulgaria, Marrocos ou Senegal.

Dan positivo tres dos 50 xornaleiros illados polo gromo de...
comentarios