O párroco de Momán, en Xermade, e Labrada, en Guitiriz, Luís Ángel Rodríguez Patiño, reivindica a "verdadeira igualdade entre homes e mulleres" e reclama unha vez máis á Igrexa, e coincidindo coa conmemoración do 8-M, a ordenación sacerdotal das mulleres.
A petición de Rodríguez Patiño á Igrexa de dar un paso cara a adiante e contar coa muller de forma oficial e igualitaria non é nova para un párroco sen pelos na lingua que se gañou moitas reprimendas ao longo dos anos.
Moi crítico co inmovilismo da Igrexa e con algunhas das súas posturas, polas súas declaracións acerca de que esa institución só quería ás mulleres para limpar gañouse un expediente. "Polo bautismo todos somos iguais en dereitos... nin homes nin mulleres, nin escravos nin libres, nin xudeus nin gregos, dicía San"Pablo , recorda Patiño, que xa presentou un traballo no ano 1997 para a Universidade Pontificia de Salamanca sobre este tema.
"O Concilio Vaticano II foi o auxe máis importante en abrir a Igrexa ao pobo de Deus onde as mulleres ocupan un papel principal pero aínda non poden ser ordenadas", di Patiño, que valora os cambios que está a dar o Papa Francisco, "moi aos poucos", pondo ás mulleres en grandes postos.
"Nomeou á primeira muller subsecretaria con dereito a voto no Sínodo de bispos", apunta Patiño. "Pero falta o máis importante", engade.
