O colectivo de transportistas mantén por cuarto día consecutivo o bloqueo ao acceso da central de Endesa nas Pontes en demanda dunha "transición enerxética xusta" e afirma que os titulares da empresa "teñen diñeiro, pero nós orgullo".
O seu presidente, Manuel Bouza, sinalou a Efe que empresarios, políticos e cidadáns a título particular sumáronse á protesta. Ademais, este luns aumentou o despregamento policial na zona.
O representante dos camioneiros declarou que están "cansados de correr, de cortar todo; Endesa cada vez mentiunos máis, que fale clariño". Así, reclamou que se lles deixe de mentir" e acusou á compañía de propiciar "noticias falsas" sobre o futuro do complexo industrial.
Neste sentido, reclamou que non "arruínen" ao pobo e afeou a súa posible intención de cesar a actividade nos seus grupos produtivos: "Que os pechen; entran 40, os camioneiros son 150 e non miraron por eles".
Bouza exhortou a Xunta de Galicia e Goberno central a que se impliquen" na resolución do conflito, desencadeado ante o anuncio de peche da térmica.
Os transportistas modernizaran os seus vehículos nos meses anteriores, afrontando investimentos elevados, e piden axudas, pero remarcan que xa hai "camións embargados".
Sobre o posible desembarco na zona de empresas vinculadas á cadea industrial do hidróxeno, replicou que lles soa a fume".
O presidente dos camioneiros ponteses sostivo que Endesa está a "desafialos" e preguntou "quen ten máis dereitos, un italiano", en alusión ao grupo Enel, titular de Endesa, "ou un pobre profesional das Pontes".
Finalmente, lamentou que non reciban "ningunha resposta" desde o inicio das súas medidas de presión. "Levamos traballando 40 anos para que a central producise diñeiro, en 20 meses non nos deron nada", remachou.
Bouza reprochou que haxa "moita" presenza policial e advertiu dun posible aumento da tensión na zona. "A xente ve que non ten futuro", subliñou, para valorar "o apoio do Concello" como único respaldo político.
Sobre o colectivo, incidiu en que son "os primeiros prexudicados" e puntualizou que a Xunta de Galicia e o Executivo central deben promover un encontro para abordar "o que vai pasar" para persoal principal, sector auxiliar e camioneiros.
Desta forma, apuntou que o "problema é tremendo, deixaron a todo o mundo abandonado", e pediu a dimisión da cúpula de Endesa. Ao seu xuízo, o seu conselleiro delegado, José Bogas, "non ten capacidade" para resolver a crise da térmica, do mesmo xeito que o seu director na zona noroeste, Miguel Temboury.
En relación á introdución do hidróxeno como alternativa industrial, cuestionou "canto tempo vai tardar en xerar emprego".
